O vindeiro mércores 15 de xuño ás 11:00 h, no salón de actos da ECIMAT, temos unha nova sesión da VI edición do Programa Café con Sal. Filipe Laranjeiro, estudante de doutoramento da Universidade de Aveiro e a Universidade de Vigo, nos presentará parte dos resultados das súa tese doutoral coa charla titulada “O sexo cambia na praia: disrupción endocrina en gasterópodos“.
A tese doutoral de Filipe Laranjeiro, codirixida por Ricardo Beiras, centrouse no estudo e monitoraxe dos efectos tóxicos causados por compostos de organoestaño (TBT e TPT), compostos comunmente usados ata a súa prohibición en formulacións de tintas anti-vexetativas aplicadas en barcos. Estes compostos son responsables do fenómeno de disrupción endócrina – imposex – que se caracteriza polo desenvolvemento de caracteres sexuais masculinos en femias de gasterópodos, chegando a causar en casos de elevada contaminación a esterilidade das femias e a consecuente desaparición das poboacións.
Durante esta conferencia Filipe Laranjeiro presentará brevemente os niveis actuais de imposex na costa de Portugal e a súa evolución durante os últimos anos, así como os resultados dun bioensaio con sedimento procedente do porto de Vigo.
Para máis información sobre esta conferencia pode ler o blog ou a páxina web da ECIMAT.
Ver programa completo do Programa de Presentacións Científicas Café con Sal.
Ver cartel da presentación de Filipe Laranjeiro.
Esperámosvos na ECIMAT.