Portas abertas

Como cada ano, o Centro de Investigación Mariña (CIM) da Universidade de Vigo abre as súas portas durante as xornadas Divulgando Ciencia Singular para dar a coñecer a investigación mariña de vangarda que desenvolvemos e a importancia que esta ten para a sociedade. En edicións anteriores amosamos as instalacións da Estación Ciencias Mariñas de Toralla (ECIMAT) –principal infraestrutura de investigación do CIM– e os laboratorios do CIM, ubicados nos edificios Olimpia Valencia e Ciencias Experimentais no Campus de Vigo e no edificio do Campus da Auga no caso de Ourense.

As xornadas de portas abertas do ano 2023 tiveron lugar o 17 e 18 de novembro e constaron de dúas actividades diferentes:

Coñece o CIM na rúa – venres 17 de novembro de 2023: o persoal investigador das diferentes áreas do CIM achegouse ao centro comercial de A Laxe en Vigo para dar a coñecer o seu traballo de investigación mariña cunha serie de obradoiros, xogos e actividades divulgativas descritas a continuación. As actividades se desenvolvéronse entre as 17:00h e as 20:30h na primeira planta do centro comercial.

A través de diferentes obradoiros, as investigadoras e investigadores do CIM realizaron demostracións e actividades para todos os públicos relacionadas con diferentes temáticas da investigación mariña como o coñecemento dos fósiles mariños, as propiedades das nanopartículas empregandas para detectar contaminantes na auga de mar, a identificación de animais mariños por métodos xenéticos, o impacto do cambio climático na pesca dun xeito lúdico, entre outros.

 

Ademais, aproveitando a proximidade do visor subacuático Nautilus que a Autoridade Portuaria de Vigo ten xunto ao centro comercial, tamén se organizaron unha serie de visitas guiadas á instalación da man de persoal do CIM.

 

Embárcate co CIM – sábado 18 de novembro de 2023: Actividade de 3 horas de duración (cada quenda) que comprendeu un traxecto en barco dende A Laxe á ECIMAT, visita ao centro, actividades guiadas e regreso a A Laxe.

 

Máis información no DUVI.

As xornadas de portas abertas englóbanse no programa “Divulgando Ciencia Singular”, cofinanciado pola Xunta de Galicia e a Unión Europea ao abeiro do Programa Operativo FEDER Galicia 2014-2020.

Edicións anteriores de Portas Abertas

2022


2021


2020


2019


2018

Galería Portas abertas 2018