Portas abertas

Xornadas de Portas Abertas

O Centro de Investigación Mariña da Universidade de Vigo (CIM) organiza anualmente as Xornadas de Portas Abertas, un evento que achega á cidadanía a ciencia mariña que se desenvolve nos seus laboratorios. Esta iniciativa convida a persoas de todas as idades a descubrir, dun xeito lúdico e accesible, o traballo do persoal investigador do centro. O obxectivo é fomentar o coñecemento, a concienciación ambiental e a sostibilidade, ao tempo que se inspira ás novas xeracións.

Co apoio da Xunta de Galicia e da Unión Europea a través do Fondo Europeo de Desenvolvemento Rexional, as Xornadas de Portas Abertas medran cada ano con novas actividades que destacan pola súa creatividade e impacto educativo. Ademais, esta iniciativa forma parte das accións oficiais do Decenio das Ciencias Oceánicas para o Desenvolvementos Sostible (2021-2030) das Nacións Unidas.

En 2024, as Xornadas de Portas Abertas celebráronse os días 8 e 9 de novembro, cunha participación de máis de 600 persoas que compartiron experiencias con preto de 70 investigadores e investigadoras do CIM. Este ano, ademais das tradicionais actividades, incluíronse novidades como un xogo interactivo e un escape room virtual, consolidando o evento como a gran festa da ciencia mariña en Vigo.

Coñece o CIM na rúa

O venres 8 de novembro, o centro comercial A Laxe transformouse nun laboratorio científico aberto de 17:00 a 20:30 horas. Os visitantes exploraron diferentes áreas da bioloxía e tecnoloxía mariñas a través de obradoiros interactivos sobre temas como:

Microfósiles mariños.
Química do mar.
Fenómenos atmosféricos e oceánicos.
Microalgas e fitoplancto.
Tardígrados mariños e o espazo.
Xenética de organismos mariños.

En colaboración coa Autoridade Portuaria de Vigo (APV), organizáronse visitas guiadas ao visor subacuático Nautilus, unha instalación permanente situada a carón do centro comercial, na que se poden observar fondos mariños en tempo real.

Novidades 2024:

Escape room virtual: Descobre máis sobre a investigación oceánica co CIM, baseado no mural que a APV, o CIM e o Campus do Mar teñen no Real Club Náutico de Vigo. Esta experiencia lúdica e educativa permitiu ao público coñecer máis sobre a investigación oceánica que se realiza no centro dun xeito lúdico e divulgativo usando o móbil como principal ferramenta.
Aquamission: un xogo xigante para explorar o mundo da acuicultura sostible, empregando un taboleiro de grandes dimensións que espertou o interese pola ciencia mariña e a investigación.

Embárcate co CIM

O sábado 9 de novembro, a actividade “Embárcate co CIM” levou ás persoas participantes nun paseo divulgativo pola ría de Vigo. A bordo dun barco-aula, exploraron a biodiversidade mariña e recolleron mostras de organismos e sedimentos, mentres o persoal do CIM explicaba a súa relevancia para comprender os ecosistemas mariños.

A xornada culminou coa visita á Estación de Ciencias Mariñas de Toralla (Ecimat), onde o público descubriu modernos laboratorios e instalacións especializadas para estudar a biodiversidade, o cambio climático e a sustentabilidade dos recursos mariños.

Ciencia mariña con nome propio

Con motivo das Xornadas, o CIM reforzou a súa presenza cunha campaña divulgativa na zona da Autoridade Portuaria de Vigo, colocando bandeiras co lema “CIM: Ciencia mariña con nome propio”, destacando o seu compromiso coa investigación e a divulgación científica.

As Xornadas de Portas Abertas do CIM son unha oportunidade única para vivir a ciencia mariña de preto e entender a importancia de coidar o océano para un futuro sostible. Mantente atento á próxima edición e únete a esta aventura científica!

Máis información