María Oliviero e Simona Schiavo, investigadoras do ENEA Portici Research Centre de Nápoles ofreceron este martes unha conferencia dentro do ciclo Café don Sal da Ecimat na que abordaron os efectos tóxicos dos microplásticos no medio mariño. Oliviero e Schiavo centraron a súa intervención nos efectos ecotóxicos e xenotóxicos do plástico e os seus aditivos sobre as larvas planctónicas mariñas e como este impacto podería afectar a niveis tróficos superiores. Neste contexto e ao abeiro do programa Assemble Plus, o proxecto Gecoplast (Genotoxicity and Ecotoxicity of Plastics and Additives on marine larvae), no que participan ambas poñentes, ten como obxectivo avaliar a ecotoxicidade e xenotoxicidade dos microplásticos e os seus aditivos en larvas mariñas. Gecoplast, está a desenvolverse na ECIMAT a través do programa Assemble Plus, e conta coa supervisión do docente e investigador do grupo Ecotox (CIM-UVigo) Ricardo Beiras.
Simona Schiavo
María Oliviero
O próximo relatorio correrá a cargo de Marcos Rubal, investigador do Interdisciplinary Centre of Marine and Environmental Research (CIIMAR, Porto), quen presentará o día 23 de abril o traballo “Mussel beds. Much more than seafood”.