A través dunha visita institucional co obxectivo de establecer sinerxías e coñecer as instalacións da ECIMAT do CIM, que lidera o CdM
O Campus do Mar e o Centro de Investigación Mariña da Universidade de Vigo (CIM) reforzan a súa aposta pola internacionalización cun encontro estratéxico co Ministro do Mar de Cabo Verde, Jorge Santos, xunto con outros representantes institucionais do país. A xornada, que tivo lugar nas instalacións da Estación de Ciencias Mariñas de Toralla (ECIMAT), permitiu afondar na cooperación entre ambas rexións atlánticas e explorar novas sinerxías en formación e investigación mariña.
A delegación caboverdiana estivo composta por figuras de gran relevancia no sector mariño. Encabezada polo Ministro do Mar de Cabo Verde, Jorge Santos, contou ademais coa presenza do Embaixador en España de Cabo Verde, Eduardo Jorge Lima Barros; o Presidente do Consello Directivo do Instituto do Mar, Albertino Ramos; o Presidente do Consello de Administración de CABNAVE, Ivan Funakoshi; o Director Nacional de Pesca e Acuicultura, Carlos Alberto Mendes; a Administradora Executiva de ENAPOR, Eneida Cristina Lima; e a asesora do Ministro, Stefanie Dalila Santos.
Por parte da Universidade de Vigo, a delegación foi recibida pola Vicerreitora de Investigación, Transferencia e Innovación, Belén Rubio; o Director do CIM e do Campus do Mar, Daniel Rey; o Director da ECIMAT, José Manuel García; a Decana da Facultade de Ciencias do Mar, Elsa Vázquez; e a coordinadora do Programa de Doutoramento DO*MAR, Ana Bernabeu.
A vicerreitora de Investigación, Transferencia e Innovación, Belén Rubio, deu a benvida á comitiva destacando a importancia do CIM como “parte da Rede CIGUS da Xunta de Galicia, o que nos diferencia como centro de excelencia en Galicia” e puxo en valor “o posicionamento do persoal investigador do centro en rankings internacionais como o de Standford”.
Longa traxectoria de cooperación
Durante a visita afondouse na longa traxectoria de cooperación existente entre o Campus do Mar e Cabo Verde, a través da que se realizaron proxectos de desenvolvemento, programas de emprendemento e de formación. A este respecto, o director do Campus do Mar, Daniel Rey, lembrou que “ambas rexións compartimos o mesmo espírito e os mesmos intereses no entorno mariño”. “Para nós é unha boa oportunidade de cara a seguir colaborando”, engadiu.
Ademais, a delegación tivo a oportunidade de coñecer de primeira man as infraestruturas de vangarda en investigación mariña da ECIMAT e as principais liñas de investigación e proxectos que se están a desenvolver no centro.
Pola súa banda, o Ministro de Cabo Verde, Jorge Santos, ofreceuse a “fortalecer este tipo de relacións entre ambos países” e mostrouse interesado por coñecer o traballo que se realiza no centro e que “podería ser de aplicación en Cabo Verde, ao que definiu como un santuario de ecosistemas mariños”.
Este encontro consolida a colaboración entre o Campus do Mar, o CIM e as institucións de Cabo Verde, sentando as bases para futuras accións conxuntas en investigación e formación. Desta forma, estase a reafirmar o compromiso do Campus do Mar e o CIM cunha ciencia mariña de alcance global, promovendo alianzas estratéxicas que contribúan ao desenvolvemento sostible do Atlántico.
Fonte: DUVI
