Nunha xornada de portas abertas celebrada hoxe na Ecimat na procura de colaboración fronte aos desafíos da economía azul e da sociedade galegas
O Centro de Investigación Mariña da Universidade de Vigo (CIM) celebrou hoxe unha xornada de portas abertas para empresas e entidades colaboradoras. Baixo o título, Construíndo xuntos a economía azul, o evento congregou 27 representantes dunha vintena de empresas e entidades non só do sector mariño, senón tamén do enerxético, biotecnolóxico ou ambiental, co obxectivo é explorar vías de colaboración futura para abordar conxuntamente os desafíos da economía azul e da sociedade galegas. Entre as empresas e entidades asistentes atopábanse a Autoridade Portuaria de Vigo, ARVI, Fundamar, Conxemar, Anfaco, Consello Regulador da DOP Mexillón de Galicia, CEAMSA, Anmupesca, Jealsa, Opmega, Humeco, 2 Rías e os GALP 7 e 6. Ademais, a xornada de portas abertas contou coa presenza de representantes de Zendal, EnergyLab, Unirisco, DATAlife DIH e Sinerxia Consultora.
O director do CIM, Daniel Rey, indicou que “as empresas achegan innovación, creación de emprego e prácticas sostibles, promovendo o desenvolvemento económico azul en Galicia. As investigacións avanzadas do CIM en biotecnoloxía mariña, sustentabilidade dos recursos e enerxías mariñas e acuicultura facilitan ás empresas desenvolver novas tecnoloxías e produtos”. Daniel Rey incidiu en que “a súa participación nesta xornada representa unha oportunidade única para fortalecer as alianzas estratéxicas e fomentar a innovación no sector proporcionando un espazo único para que as empresas e organizacións colaboren co CIM en proxectos de investigación de vangarda, desenvolvemento de solucións sostibles e fortalecemento da responsabilidade social e ambiental”.
Visita guiada á estación e cóctel de traballo
A xornada de portas abertas comezou cunha visita guiada á Estación de Ciencias Mariñas de Toralla (Ecimat) na que os e as participantes descubriron de primeira man os avances e proxectos innovadores que o CIM está a desenvolver. Posteriormente, desenvolveuse un cóctel de traballo no que o persoal investigador e os asistentes puideron establecer conversacións de cara a establecer posibles oportunidades de cooperación. Por último, empresas, entidades e persoal investigador embarcou no Ocean Secrets para realizar un paseo científico pola Ría de Vigo durante o que puideron compartir un espazo no que se fomentou o intercambio de coñecementos e a creación de alianzas estratéxicas que poden ser cruciais para o desenvolvemento sostible do sector mariño.
Para Rey “a colaboración entre as empresas do sector da economía azul en Galicia e o CIM é fundamental para afrontar os desafíos futuros, promovendo a innovación, a sostibilidade e o desenvolvemento económico na rexión. Esta sinerxía mellora a competitividade das empresas e contribúe á protección e ao manexo responsable dos recursos mariños, asegurando un futuro próspero e sostible para Galicia”, engadiu.
A actividade investigadora do CIM conta cofinaciamento da Xunta de Galicia e a Unión Europea, a través dos Fondos Europeos (FEDER).
Foto: DUVI
