O día 9 de abril ás 11:30 o profesor Emilio Rolán fará un repaso a 50 anos adicados ao estudo de diferentes familias de pequenos moluscos gasterópodos, con especial enfoque no xénero Conus.
Emilio Rolán é investigador Ad Honorum do Museo de Ciencias Naturais da Universidade de Santiago de Compostela. Médico pediatra e Doutor en Bioloxía, Emilio desenvolveu multitude de actividades tanto científico/investigadoras como artísticas, ao longo da súa vida.
En 1963 inicia a súa actividade na Malacoloxía, creando unha colección de moluscos que na actualidade contén máis de 25.000 lotes catalogados, ademais dunha gran cantidade de lotes e material pendente de estudo cun total aproximado superior probablemente a dous millóns de conchas e exemplares. A maior parte deste material, foi obtido mediante propia recolección en numerosos países do mundo. Actualmente a colección está depositada no MUSEO DE HISTORIA NATURAL LUÍS IGLESIAS da Universidade de Santiago de Compostela.