Unha delegación do Hub Azul Leixões visitou o Centro para explorar sinerxías de cara ao desenvolvemento de infraestruturas científicas similares no país luso
Unha delegación da iniciativa Hub Azul Leixões de Portugal visitou hoxe o Centro de Investigación Mariña (CIM) da Universidade de Vigo co obxectivo de estreitar a colaboración institucional, explorar sinerxías co sector mariño luso e desenvolver infraestruturas científicas e tecnolóxicas relacionadas coa economía azul. Concretamente, realizaron un percorrido polas instalacións da Estación de Ciencias Mariñas de Toralla (ECIMAT), que está recoñecida como Centro de Apoio á Investigación (CAI) da Universidade de Vigo e forma parte da infraestrutura europea EMBRC-ERIC (European Marine Biological Resource Centre).
A visita enmárcase dentro do Hub Azul Leixões – Polo 1 (HAL), unha iniciativa estratéxica para impulsar a innovación e o desenvolvemento tecnolóxico na contorna do Porto de Leixões (Portugal). O HAL está composto por entidades relevantes no ámbito marítimo e tecnolóxico do país luso. Concretamente, está formado polo Instituto de Engenharia de Sistemas e Computadores, Tecnologia e Ciência (INESC TEC), líder do consorcio; xunto coa Administração dos Portos do Douro, Leixões e Viana do Castelo (APDL); a Câmara Municipal de Matosinhos (CMM); e o Centro Interdisciplinar de Investigação Marinha e Ambiental (CIIMAR), o Instituto de Ciência e Inovação em Engenharia Mecânica e Engenharia Industrial (INEGI); e o Fórum Oceano.
O obxectivo principal do HAL é desenvolver e probar tecnoloxías oceánicas que promovan unha economía azul sostible. Ademais, contribúe á monitorización e xestión dos ecosistemas mariños e ofrece diversas iniciativas destinadas á formación de recursos humanos altamente cualificados para as actividades marítimas, atendendo ás necesidades do mercado da economía do mar e ás tendencias cara a modelos económicos máis dixitais e respectuosos co medio ambiente. De aí o seu interese por coñecer o CIM, xa que estas temáticas coinciden coas prioridades científico técnicas do centro (acuicultura e marisqueo, contaminación mariña, impacto do cambio climático e enerxias renovables mariñas). Igualmente, o centro é unha referencia en investigación mariña aplicada e xestión de servizos científicos, para identificar boas prácticas, establecer sinerxías e explorar vías de colaboración transnacional.
Durante o encontro, o CIM presentou nunha mesa redonda as súas principais liñas de traballo, o seu modelo de funcionamento como centro de investigación mariña de referencia en Galicia e membro da Rede CIGUS e a súa implicación en infraestruturas científicas europeas como EMBRC (European Marine Biological Resource Centre). Tamén se espuxo o ecosistema de colaboración transfronteiriza que representa Campus do Mar, que lidera o CIM.
Intercambio de experiencias e búsqueda de sinerxías
A reunión permitiu un intercambio de experiencias ao redor da xestión e sustentabilidade de coleccións biolóxicas mariñas, a transferencia de coñecemento á industria e as estratexias para poñer ao dispor da comunidade científica e empresarial os datos e servizos vinculados a biobancos e bancos de cultivos. Este encontro facilitou a identificación de oportunidades de innovación conxunta, o impulso de alianzas público-privadas e o fortalecemento do papel da ciencia como motor de transformación en sectores estratéxicos vinculados ao mar. Estaban especialmente interesados en avanzar na investigación do aproveitamento da enerxía eólica combinada coa acuicultura e en explorar novas posibilidades para a enerxía undimotriz.
A delegación portuguesa estivo integrada polo Dr. Rui Azevedo, asesor estratéxico de Fórum Oceano; Margarida Macedo, responsable do Plan de Sustentabilidade do proxecto HAL; Álvaro Amorim, en representación do municipio de Matosinhos; Diogo Alexandrino, investigador do CIIMAR responsables do biobanco do Hub Azul de Leixões; e Ana Chaves, responsable de Comunicación do HAL. Foron recibidos pola directora da área de investigación da Universidade de Vigo, Ana Bernabeu; o director do CIM, Daniel Rey; o subdirector do mesmo, Moncho Gesteira; e o director da ECIMAT, José Manuel García.
O director do CIM, Daniel Rey, valorou “moi positivamente esta visita como unha oportunidade para fortalecer as nosas relacións con institucións internacionais e compartir as nosas experiencias na investigación mariña”. Igualmente, destacou que “para o CIM é fundamental establecer lazos coa industria do mar a nivel internacional e este encontro reforza a nosa aposta pola internacionalización dos nosos servizos científicos e posiciónanos como un socio estratéxico no desenvolvemento dunha economía azul europea máis conectada, sostible e innovadora”. “A colaboración transnacional é clave para avanzar na sustentabilidade dos ecosistemas mariños e estamos convencidos de que, a través destes intercambios, poderemos identificar novas vías para a innovación tecnolóxica e a conservación dos nosos recursos mariños”, engadiu.
Pola súa banda, os representantes do Hub Azul Leixoes explicaron que, ademais do CIM, “están a visitar centros de referencia europeos, como o Institut Ifremer en Nantes (Francia), o Instituto Hidráulico de Cantabria e o centro mariño de Roscoff (Francia)”.
O CIM conta co recoñecemento CIGUS da Xunta de Galicia, que acredita a calidade e impacto da súa investigación, e a súa actividade está cofinanciada pola Unión Europea a través do Programa FEDER 21-27.
