MytUniSex, primeiro proxecto seleccionado no programa de emprendemento Sherpa Journeys

Etiquetas

O proxecto MytUniSex, coordinado polo investigador do Grupo de Xenética de Poboacións e Citoxenética (XB2) do CIM, Ángel P. Diz, vai recibir apoio para a súa valorización e posta en marcha a través de Sherpa do Mar, un programa europeo liderado polo grupo de investigación REDE da Universidade de Vigo no que tamén participan Campus do Mar e a oficina de I+D. Este martes déronse a coñecer os 12 proxectos gañadores da primeira edición do seu programa de emprendemento Sherpa Journeys, unha iniciativa coa que os socios do programa queren axudar a impulsar a creación de produtos e servizos innovadores que acheguen solucións de alto valor engadido a necesidades reais do ámbito mariño-marítimo.

Os proxectos seleccionados nesta primeira edición destacan polo seu gran compoñente innovador e ofrecen respostas de alto valor engadido a retos como a dixitalización, o uso sostible dos recursos, a seguridade e trazabilidade alimentaria, o ecoturismo ou a protección e conservación do ecosistema mariño. A maior parte atópanse en fase de concepción e prototipado, aínda que tamén están presentes iniciativas emprendedoras e de interemprendemento en fases de maduración máis avanzadas.

Todas as iniciativas seleccionadas accederán a un programa especializado e de apoio integral, de 14 meses de duración, no que estarán acompañados dun xestor especializado en promoción do emprendemento e transferencia de tecnoloxía e coñecemento e recibirán asesoramento científico-técnico. Durante este proceso contarán con mentorización, formación, xornadas de networking, así como servizos e medios técnicos para consolidar o seu desenvolvemento e crecemento. Trátase de crear un ecosistema transfronteirizo de emprendemento innovador no ámbito mariño-marítimo e da blue economy, que favoreza a xeración de emprego, as sinerxías e a competitividade empresarial.

Uso sostible dos recursos, trazabilidade alimentaria, ecoturismo…

Abárcanse sectores como o acuícola, o conserveiro, o portuario, a pesca ou o turístico. A listaxe dos 12 proxectos seleccionados inclúe ademais do proxecto MyUniSex, que propón a produción de liñas de mexillón unisex a gran escala e de forma sostida ao longo do ano, o proxecto ActivaeAlgae, centrado na creación de produtos cosméticos de orixe natural, baseados en extractos de microalgas e con propiedades antiinflamatorias, hidratantes ou protectoras contra os raios ultravioletas; Bima, dirixida ao desenvolvemento de solucións tecnolóxicas baseadas en GIS e enfocadas a mellorar a competitividade do sector portuario; Subgo, proxecto de realidade virtual, aumentada e mixta dirixida á investigación e divulgación científica de paisaxes submariñas con aplicacións no sector da educación e do ecoturismo; ValBioSea, extracción para a selección de compostos bioactivos, de alto valor engadido; DanteRoNPs, solucións de tecnoloxía de eliminación de nano-plásticos no ecosistema mariño; Fish & Food Technology, de trazabilidade e seguridade alimentaria de produtos pesqueiros; Sailing For Science, enfocado na creación de experiencias de turismo científico mariño; Container Over Board System, un sistema de localización de contedores  e flotabilidade que permita xerar alertas que reduzan a xeración de vertidos contaminantes ou posibles situacións de risco para a navegación ou o medio mariño; Blue Bioprana, solucións de biotecnoloxía que reducen o impacto ambiental; ABZU Maritime Platform, unha plataforma de operacións portuarias; e Basemar, balizas con fondeo ecolóxico para sinalización marítima e de parques de cultivo de marisco que ofrecen datos en tempo real.

MytUniSex, coordinado polo investigador do Grupo de Xenética de Poboacións e Citoxenética (XB2) do CIM, Ángel P. Diz., e no que participan Paloma Morán, Juan J. Pasantes e Sofía Blanco, investigadores do grupo XB2, Estefanía Paredes, investigadora do Grupo de Ecoloxía Costeira, e Damián Costas, técnico da Estación de Ciencias Mariñas de Toralla (Ecimat), posicionouse como o primeiro proxecto seleccionado. O proxecto conta ademais co apoio da Xunta de Galicia e a Unión Europea, a través do seu cofinanciamento ao abeiro do Programa Operativo FEDER/FSE Galicia 2014-2020. MytUniSex producirá liñas de mexillón unisex a gran escala e de forma sostida ao longo do ano mediante a  implementación dun programa de reprodución intensiva en laboratorio. Os investigadores preven lograr viandas de tonalidade laranxa intenso, as  máis apreciadas polo consumidor e de gran valor comercial para a  industria conserveira, ou subproductos de alta calidade e con valor engadido, como podería ser o caviar. O proxecto busca ademais promover o uso sostible dos recursos mariños, ofrecendo unha alternativa que podería reducir a necesidade de colleitar a semente no intermareal rochoso. O proxecto MytUniSex expón unha proposta cun forte compoñente en I+D e cun grao de desenvolvemento moi avanzado, pois o seu promotor líder, Ángel P. Diz, demostra un amplo coñecemento da tecnoloxía presentada e os seus produtos asociados e asegura que “se trata dunha tecnoloxía innovadora e con gran potencial de mercado no ámbito mariño-marítimo eurorregional”.

Recibíronse máis de 60 candidaturas

Liderado polo grupo REDE e coa participación de Campus do Mar e a Oficina de I+D da Universidade de Vigo, Sherpa Journeys conta tamén co apoio do Consorcio Zona Franca de Vigo, a Axencia Galega de Innovación ( GAIN) e as universidades de Santiago e A Coruña. Por parte de Portugal, participan a Associacão de Transferência de Tegnologia de Asprela ( UPTEC), a Universidade do Porto, o Centro Interdisciplinar de Investigação Marinha e Ambiental ( CIIMAR) e o Forum Oceano- Associacão dá Economia do Mar.

Nesta primeira edición do programa presentáronse  a esta iniciativa máis de 60 propostas que formarán parte dun catálogo de ideas de negocio en liña, onde se lles dará a oportunidade de gañar visibilidade para establecer contactos con potenciais colaboradores e investidores. Este directorio web vai estar tamén aberto a emprendedores que non participaron na convocatoria. O único requisito é que a idea de negocio estea afincada en Galicia ou no norte de Portugal e que cubra unha necesidade do sector mariño-marítimo baseada en coñecemento científico-técnico.

Fonte: DUVI