O martes 21 de maio, María Oliviero e Simona Schiavo, investigadoras do Centro de Investigación ENEA – Portici Research Centre (Italia), presentaron, dentro do ciclo “Café con Sal”, a conferencia “Efectos tóxicos dos microplásticos no medio mariño“, na que resumiron o impacto que teñen os microplásticos nos organismos mariños, centrándose nos efectos ecotóxicos e xenotóxicos do plástico e os seus aditivos sobre as larvas plantónicas mariñas, e como este impacto podería afectar a niveis tróficos superiores.
A produción global anual de plástico é de ao redor de 300 millóns de toneladas e constitúe unha das maiores preocupacións para o medio ambiente. Os microplásticos están presentes no medio mariño desde a superficie do mar ata os sedimentos. Neste contexto e coa axuda do programa ASSEMBLE Plus, o proxecto GECOPLAST, no que participan ambas poñentes, ten como obxectivo avaliar a ecotoxicidade e xenotoxicidade dos microplásticos e os seus aditivos en larvas mariñas.
