A mediados de setembro, representantes das rexións de Creta, Algarve, Bretaña, País Vasco, Galicia, Occitania, así como Infraestruturas de investigación como o European Marine Biological Research Infrastructure Cluster (EMBRIC, do cal forma parte a ECIMAT), reuníronse en Heraklion, Grecia, por iniciativa de EMBRIC para discutir a mellor maneira de fomentar o desenvolvemento da bioeconomía azul.
Os participantes acordaron unha axenda estratéxica conxunta que inclúe un mapeo completo da experiencia rexional, un intercambio de mellores prácticas e un esforzo conxunto para establecer unha plataforma de investimento paneuropea para superar desafíos comúns, como atraer ás PEME ou financiar proxectos en etapas avanzadas. “Queremos que o coñecemento mariño e a innovación sustentable sexan a impulsores clave para o crecemento da bioeconomía azul”, resumiu Eleni Hatziyanni, Directora de Medio Ambiente e Ordenación do Territorio da rexión de Creta.
Durante a reunión, todas as rexións participantes presentaron o seu estado actual de compromiso político no espazo da bioeconomía azul. Os oradores destacaron as prioridades específicas para os investimentos e as fortalezas competitivas de cada área. Annie Audic, en representación da rexión francesa de Bretaña, destacou que “A biotecnoloxía azul é un sector prometedor e de rápida evolución que aínda non está totalmente explotado. Isto débese en parte á falta de definición que abarca a biotecnoloxía azul”. Por esta razón, os participantes acordaron que o sector avanzará con maior eficacia cando as partes interesadas rexionais mapeen os seus diversos coñecementos e actividades e recompilen exemplos das mellores prácticas existentes en ciencia e economia. As partes interesadas da biotecnoloxía azul tamén explorarán a oportunidade de establecer unha “Plataforma de investimento interregional” conxunta. Un estudo publicado polo Banco Europeo de Investimentos recomenda plataformas de investimento como estruturas de financiamiento e acordos de cofinanciamiento ou de risco compartido que combinan os recursos de varios investidores e están parcialmente apoiados por unha contribución pública.
Outro tema exposto durante a conferencia foi a posibilidade dunha cooperación máis estreita entre as infraestruturas académicas, os expertos rexionais e as empresas. “Necesitamos construír un mosaico de crecemento azul”, subliñou Ibon Cancio, que representa á rexión vasca. Bernard Kloareg, quen lidera o grupo EMBRIC e dirixe EMBRC-Francia, pechou a reunión salientando que as rexións marítimas poden utilizar as Infraestruturas de Investigación para crecer e acelerar o crecemento da bioeconomía azul. Planéase unha reunión de seguimento para finais de 2018.
Acerca de EMBRIC: O Clúster Europeo de Infraestrutura de Investigación Biolóxica Mariña (European Marine Biological Research Infrastructure Cluster, EMBRIC) está deseñado para acelerar o ritmo do descubrimento científico e a innovación dos recursos biolóxicos mariños. EMBRIC ten como obxectivo promover novas aplicacións derivadas de organismos mariños en campos como o descubrimento de fármacos, novos alimentos e ingredientes alimentarios, a cría selectiva de acuicultura e cosméticos. EMBRIC, iniciado en xuño de 2015 estará activo ata maio de 2019 e está coordinado por Sorbonne Université, París, Francia.
Este proxecto recibiu financiamento do programa de investigación e innovación Horizon 2020 da Unión Europea en virtude do acordo de subvención nº 654008.