Desentrañando o papel das vitaminas do grupo B sobre o plancto microbiano

MArgalef

A próxima semana investigadores da agrupación OCEANO-ECIMAT dan comezo ás campañas ENVISION a bordo do buque Ramón Margalef. As campañas ENVISION enmárcanse dentro do proxecto “Desentrañando o papel das Vitaminas do grupo B na estrutura da comunidade, actividade e sucesión do plancto microbiano nun sistema de afloramento costeiro (ENVISION)”, financiado polo Ministerio de Economía e Competitividade, e teñen como obxectivo estudar, por primeira vez, a dinámica das vitaminas do grupo B e o seu papel na dinámica do plancto microbiano nunha rexión altamente produtiva. No proxecto participan, ademais de investigadores da agrupación OCEANO-ECIMAT, concretamente do grupo de oceanografía biolóxica da Universidade de Vigo (http://gobio.webs.uvigo.es/), investigdores da Universidade de Linneo (Suecia) e da Universidade do Sur de California (EEUU).

grupo GOB citexviGrupo de Oceanografía Biolóxica

Tal como apunta Eva Teira, Investigadora Principal da campaña, “o papel das vitaminas na regulación das comunidades microbianas planctónicas foi ignorado durante anos, a pesar de que, por exemplo, demostrouse que a maioría das especies de fitoplancto necesitan unha fonte externa de vitamina B12 para crecer, posto que carecen da ruta metabólica para a súa síntese. Só recentemente púxose a punto a metodoloxía adecuada para medir a concentración de vitaminas no mar. As escasas medidas obtidas ata a data demostran a existencia de extensas rexións oceánicas, incluídas zonas costeiras, onde a concentración de vitaminas do grupo B é extremadamente baixa, o que suxire que estes compostos orgánicos poderían limitar o crecemento de determinadas especies do plancto microbiano en grandes áreas do océano”.

O obxectivo xeral do proxecto é determinar se a dispoñibilidade de vitaminas do grupo B inflúe na abundancia, distribución e actividade do plancto microbiano nunha rexión altamente produtiva. Para iso, o Grupo de Oceanografía Biolóxica da Universidade de Vigo, organizou 3 campañas oceanográficas a bordo do B/Ou Ramón Margalef, na zona de transición costa-océano fronte á Ría de Vigo, durante as cales tratarán de: (1) caracterizar a variabilidade espacial e temporal da concentración das vitaminas do grupo B na columna de auga; (2) avaliar a variabilidade espacial e temporal da resposta da comunidade microbiana á adición de nutrientes e/ou vitaminas B1 e B12; e (3) estudar o papel das vitaminas do grupo B na sucesión de especies do plancto microbiano. Seguirán unha aproximación multidisciplinar, incluíndo a medida de gran cantidade de variables físicas, químicas e biolóxicas na zona de mostraxe, a realización de experimentos a bordo do barco, e a aplicación de ferramentas moleculares máis sofisticadas como análises metaxénomicos e metatranscriptómicos.

As campañas comezarán a próxima semana levándose a cabo, previsiblemente, durante 3 situacións hidrográficas contrastadas: (1) inicio da proliferación fitoplanctónica (ENVISION-I, 17-26 de febreiro de 2016); (2) condicións de afloramento na primaveira (ENVISION-II, 16-25 de abril de 2016) e (3) condicións de afloramento no verán (ENVISION-III, 2-11 de agosto de 2016).